Vi voddu avà racuntà
Incu tanta emuzioni
A storia é lu campà
Di un omu d’eccezzioni
Chi ci facia viaghjà
Incu l’impruvisazioni
Pà issu pueta asgiatu
Principiu avà lu cantu
Ch’iddu sia rimarcatu
E ne purtessi lu vantu
Di lu versu prufumatu
Chi li piacia tantu
Natu in quissa puvertà
D’una famidda maiori
Duvia sempri stantà
Pà un pocu di chjarori
Chi u facia sunnià
Luntanu dà issu malori
Istruzzioni un avia
E ne diventò pastori
Incu sola cumpagnia
Da la sera à l’albori
U versu di puesia
Chi tinia in u cori
Li piacia lu mistieru
Ne cunniscia l’arti
Di u so locu era fieru
Ni parlaia ogni parti
Cù corsu é furesteru
Issu fruttu vulia sparti
Tinia a la tradizioni
Un mancava una fiera
Di messa in prucissioni
A fedi era sincera
Dendu vodda di canzoni
Da la mani a la sera
Suitendu quissa stonda
Chi u pueta tantu ama
Iddu sapia risponda
A lu sunà di la chjama
Di a musa vagabonda
Avia l’eterna brama
Vola avà la so rima
In u celu d’erternità
Lampendu cù tanta stima
Un versu pà issi quallà
Incu quidd’estru di prima
Chi a saputu cunservà
Compiu avà la canzona
Di quiss’ultimu ramentu
Ricurdà quissa parsona
Mi annacqua da lu pientu
Chi sempri in mè risona
U so immensu talentu
Speru solu ch’issa vita
Fatta di fedi é onori
Sia sempri custudita
In u fondu d’ogni cori
Ricurdendu a l’infinita
Quissu pueta pastori
U PASTORI BUNIFAZINCU
3 commentaires:
Caru amicu,
eccu vinutu u tempu di mandati ancu nò u nosciu sustegnu è tutti i nosci filicitazioni par a biddezza è u talentu chì si manifistghjani in i to puisi.
cuntinivighja in issu modu, chì sè di quiddi chì facini lucicà alta è chjara a fiara di a noscia cultura, bedda petra par a custruzzioni di un mondu più fraternu è più umanu.
Ti salutu incù affizzioni à u me nomu parsunnali è par quiddu di u gruppu Novi è d'altrondi issendu un amicu di a to famidda mi parmettu cù issu fugliettu d'abbraccià li tutti.
A prestu nantu à issi stradi di a cultura è di a fratellanza.
Ghjuvan Carlu Papi
manifica nant'à li pastori sò e più belle
Enregistrer un commentaire