Ti ne spunti a l’orizzonti
Trà i cunfini di li monti
Tali un sussuru luntanu.
Abbracendu ogni vintata
Di un’altura diventata
Lu to rifughju supranu
Trà li spinzi é li ripali
Di un alloghju naturali
Ricerchi una serenità.
Inguttupata in u velu
Di quissu maestosu celu
Ch’ai saputu ammaistrà
Da li monti à la marina
Se la stedda matutina
Di quissu divinu altari.
Chi sfrisgina tarra é onda
Tali un ombra vagabonda
Ghjunta da tramonti chjari
In ricordu d’issi mumenti
Quiddi passati é prisenti
Cerchi un fiatu di libartà.
Chi suffiarà in u to pettu
Cum’un vintuleddu schiettu
Ch’hà l’eternu ti farà campà
U PASTORI BUNIFAZINCU
3 commentaires:
Chi furtuna sta mane, di leghje e puesie d'un puetu a pena sbugitu da a zitellina e chi digia pussede una maturita extraordinaria. Quella di l'omi chi anu a capacita di purta un altru sgardu n'anta e cose chi c'ingiranu. Cume u volu di l'altagna ti pregu un parcorsu puetica altu e ligeru, ma no menu prufondu e liberu per purta a cultura corsa sina e cime supprane.T'abracciu in cara fratellanza corsa.Ghjuvanni Ponteri
Duie parullette da dì quant'ellu hè piacevule di leghje puesie d'un giovanu scrittore annant'à a cusì detta "reta". Sò versi belli squisiti chì palesanu una maestria di a lingua abbastanza soda, cù una manera uriginale di prisentà i sintimi. Ti pregu di cuntinuà à impennà cù listessu estru sapendu chì scrive hè dinù bisognu.
Saluti tanti.
Menozzi Petru-Santu
un salutu e un abbracciu da u to amicu sicilianu!
cuntinua cusi pè fa campa' a lingua!
Enregistrer un commentaire