HE PARTUTU U PUETA

U PUETA ÙN MORI ... U PUETA SI NE VÀ

Hè partutu u pueta,

Nantu à strada fatata

Marchjendu à l’ispinsata

Versu un altra pianeta,

Ch’ogni ghjornu si disceta

In rima impruvisata.

Hè partutu u pueta

A sfrisginà novi mondi,

Alusinghendu i spondi

Di una tarra sicreta,

Duva la so voci cheta

Canta in chjam’ é rispondi.

Hè partutu u pueta

Lasciendu i so turmenti,

Pà ritruvà la so ghjenti

Nant’à nivuli di seta,

Duv’avali si mireta

Di dorma eternamenti.

U PASTORI BUNIFAZINCU

"In mimoria di u pueta Martinu Versini"