lundi 19 janvier 2009

" ANNU NOVU "


Tù chì ghjunghji puntuali

E t’affachi spinsiratu,

Da tutti sè aspittatu

Pà stancià u timpurali,

Risanà i nosci mali

E appacià u passatu.


Sè u sognu ideali

D’un avvena più sebiatu,

Senza odiu ne piccatu

Ma solu piacè é sciali,

Pà un novu nidicali

Di spiranza intricciatu.


Spalanca quì i to ali

Versu u celu bramatu,

Ogni mumentu spannatu

Da un eternu fanali,

D’amori tradiziunali

E rispettu incalcatu.


In i stondi inguernali

D’issu mondu infribbatu,

Purtaci à u to latu

Nantu u biancu ripali,

Duva ferma tali é quali

U solcu di l’antinnatu.


Manteni u naturali

E l’estru aggalabbatu,

Fà ch’ogni ziteddu natu

Cù l’altri sia uguali,

Sempri un corsu leali

A issu locu arradicatu.


U PASTORI BUNIFAZINCU

2 commentaires:

Anonyme a dit…

Bella puesia ;)

Ghjanpa a dit…

Leghju oghje in lu Foru,li to vinti anni,caru amicu pueta ,oghje tutti li mo saluti sò per tè.

À prestu

Dò dinù un salutu à le ghjente di u Foru.